.

 
.

Muyeres, cine y publicidá. ¿Asina son les coses y asina-nos les cuenten?
Coordina: Grupo de trabajo Medios de Comunicación (cambalache)
Presentación
Los medios preséntensenos como una ventana abierta a la realidá. A traviés d'ellos tenemos accesu al mundu, a los sucesos más llonxanos y a los fechos más inmediatos. Sicasí, ente la realidá y los nuestros güeyos ta'l cristal de la ventana que dicen ser los medios. Ye un cristal que devuelve imáxenes distorsionaes, agrandando y engordando les representaciones que lexitimen el poder políticu y económicu, al tiempu qu'invisibiliza o desprestixa toes aquelles realidaes que cuestionen o nun encaxen nel modelu social, afitáu na competitividá, el consumu y el productivismu.
A traviés de los discursos que tresmiten los medios (noticies, reportaxes, tertulies, películes, menxases publicitarios, etc.) contribúin a construyir la realidá, reforzando y destacando unos valores, modelos de comportamientu y de vida que, en cuantes que medios de difusión masiva, acaben convirtiéndose causi nos únicos referentes válidos de lo que ye y lo que nun ye "normal" y, polo tanto, "natural".
Esto amuésase a les clares nes imáxenes que muestren de les muyeres. Les muyeres realizamos el 70% del trabayu nel mundu, pero la mayor parte de les veces los medios muéstrennos como seres pasivos, dependientes, espectadores o víctimes de la realidá, pero cuasi nunca protagonistes o facedores de la mesma. D'esta manera, la discriminación de les muyeres atopa un apoyu simbólicu y continuidá na comunicación de mases.
El cine y la publicidá son dos espacios nos que les muyeres tienen un llugar "privilexáu": son el soporte de la belleza y el vehículu de la maldá, el remansu de paz y les dioses protectores de la familia, les competidores en deencia y llimpieza (que debe dir xunto) y les bruxes del alcohol, les executives inhumanes y les madres proveedores... y en medio de toes elles... el restu.
De too esto queremos falar nel cursu, estableciendo un diálogu ente nosotres y les nuestres imáxenes nel cine y la publicidá, construyíes, reconstruyíes y modelaes pol patriarcáu
Conteníos
- Introducción a los medios de comunicación dende la perspectiva de xéneru.
- Muyeres y cine.
- Les muyeres na publicidá.
Duración: 20 hores. Díes: del 18 d'ochobre al 29 de payares (llunes). Hores: de 19.00 a 22.00h.
Matrícula: de baldre. Plazes llimitaes.
Más información y inscripciones:
Oficina d'Información Xuvenil de Llangréu. C/ Celestino Cabeza 3, La Felguera, Tfnu.: 985 676 503. (juventud@ayto-langreo.es)
el local cambalache. C/ Martínez Vixil 30-baxu, Uviéu. Tfnu.: 985 202 292 (cambalalache@localcambalache.org)