El sábadu 22 de payares, a les 18h Presentación del llibru Caleyos de la memoria, Conceição Evaristo [Trabe, 2025]. Con Henrique G. Facuriella (traductor) y Rafa R. Valdés (editor). [20ª Feria del Libro]

La favela onde viven van valtala. Saben que nun ye’l paraísu, pero naide nun quier marchar d’ellí: too aquello llevantóse enriba del destierru y de la miseria de caún y faen d’ello razón de vida.

Maria-Nueva vive ellí, pero ella escucha y atiende, nun pierde gota de les histories que les muyeres cuenten pelo baxo. Maria-Nueva tien una gana de saber qu’arde delantre de cualquier cosa, colecciona sellos y histories y tien un deséu doliosu d’escribir pa contanos too aquello, pa tresmitinos les voces silenciaes de quien moren na favela.

Va ser ella la que va facer memoria y la que va dar voz a quien tán asitiaes nos márxenes d’una sociedá que les esclúi. Ye ella la qu’escueye les piedres puntiaes que más manquen y la que tien los oyíos, los güeyos y el corazón abiertos, lo necesario pa traenos nesta novela les vides de quien nunca nun ganaron y quieren más escaecer les histories d’esclavitú mientres los rellampos furen el cielu de Belo Horizonte.

Asina les coses, anímovos a percorrer estos caleyos de la memoria, estes histories cosíes como los retayos d’una colcha que se tresmite de xeneración en xeneración y que son un auténticu homenaxe póstumu a les muyeres afrobrasileñes que madrugaben pa enllenar los tendales cola ropa puesto al sol.