Llara tien once años, ye una rapacina de guedeyes azafranaes, güeyinos gris muy guapo y la tiez lo mesmo que la ñeve cuando trapia curioso n'iviernu. La ma ye ciruxana y sal tolos díes mui ceo de casa camín del hospital; el pá ye traductor y cuando Llara entamó Primaria, como nun entendía mui bien la profesión del pá, él dixo-y que yera poner les pallabres d'un idioma n'otru, pa que les persones que namái falaben la so llingua y nun entendíen la primera, pudieren conocer más y tener más cultura.

El pá llevala tolos díes a escuela y llueu vulve pa siguir trabayando, porque, pensaba Llara, la mio ma tien de colar pa trabayar, pero'l mio pá tien el llabor en casa, por eso siempre ta la mesa l'ordenador toa enguedeyada de papelorios y diccionarios... ¡claro! ellos tienen que trabayar y yo dir a escuela pa deprender..., non, nun ye que nun me preste estudiar, pero, pero, pero... ¡¡¡prestaríame más columbrar el cielu traviés el telescopiu...!!!