Cincuenta son les pieces de prosa miscelánea qu’arrecueye esti volume de Pablo Texón, d’escritura áxil y depurada, fresca y singular: fondamente humana, onde realidá y ficción dílense de la que Marcel Proust apaez silenciosu n’El Monte Alende, a la vera la casa los güelos del autor-narrador. Llibru singular, quien llea ha esfrutar desque entame hasta lo último con una lliteratura d’estremaos escenarios y personaxes, d’igual intensidá, na que rescamplen la ironía y una mirada aliella a la sociedá y a la xente de so, la que ye y la que fo. Una lliteratura que, como diz Pablo Texón, que ye l’autor, «ha obrar el milagru y unir pasáu (señaldá) y futuru (ambición); tien que mostrar la singularidá, les singularidaes y, nun esparabán máxicu, consiguir que la conectemos cola universalidá. Tien que facenos saber que somos puros, pero que nun tamos tan solos. Anque’l día en que nun síamos distintos, únicos, irrepetibles nel dolor, esi día, acabará’l ser humanu».