Nesta novela de Vigdis Hjorth protagonizada por Arnold y Ida hai amor y sexu –quiciabes más sexu qu’amor–, vergoña y desgracia –más lo segundo que lo primero–, deséu y suaños –empate a unos–, estrozu y compasión –más lo primero que lo segundo–, xampán y electricidá –a embute–, inquietú y mieu –van tencontén–, preguntes, cartes y promeses –a esgaya–, una muyer y un home en carnes –bien de veces–, bébora –sobre manera cerveza, whisky y vinu–, perdón y maldición –más d’Arnold que d’Ida–, angustia y celos –apré–, dolor y desosiegu –enforma–, pornografía y folletéu –córrense los dos–, castigu y sufrimientu –na balanza anden más menos igual–, faladuríes y nueches –pa qué quies más–, tristura y dañu –una barbaridá–, ansiedá y resaca –bayura d’ello–, sofá y cansanciu –da igual cómo lo interpretéis, vais acertar–, télefonu, espera y decepción –trés pates d’un tayuelu–, perfume y agua de lentilles –nun lo beber, facéi’l favor–. Nesta novela conxúgase’l verbu mancar en presente y acullá de lo que nun se diz y de lo que nun s’entruga, que nun vos caiga embaxo que vais enfrentavos a la llectura d’unes páxines enllenes d’obsesión, conflictu, infidelidá y toxicidá. Asina les coses, abríi les fueyes d’esti llibru, viaxái hasta Noruega, llevantái la copa ¡y que vos preste!