Bienllegaes a Alento, un llugar creáu por Carmen Pellegrino que puede considerase guapamente símbolu de tolos pueblos muertos que nun dexen de siguir moviéndose y esbarrumbándose. Un llugar onde hai que mirar les cases per fuera y onde solo muerre aquello que nun s’entrega. Un llugar afaráu por una fana pero con una gran llamera de sueñu insomne. Un llugar onde’l día puede quedar guapu pa un funeral. Sía comoquier, Alento y los alentinos vuelven a la vida al traviés de la mirada de la escritora italiana porque, talo que cantaba Llan de Cubel, el mundu ye pergrande si ye grande’l corazón; nesti casu, el de toles persones que tais invitaes a esti finu banquete lliterariu y sanador que recupera, renoma y pobla la memoria de quien busquen otra manera de tar en mundu.
Asina les coses, sentáivos a la mesa con Ada, Marcello, Giorgio, Libera, Maccabeo, Cola, Consiglio, Giacinto, Lucia, Mariuccia, Peppa y Gedeon, y ponéivos a lleer Cai la tierra de cuenta que vos despierte la mesma sensación que teníen ellos cuando Estella-yos daba figos rellenos: non solo ye que-yos gustaben, sinón que los comíen con gana, hasta l’últimu d’ellos. Y depués bebíen agua a sorbiatinos pa nun quitase’l tastu de la boca. Namás que vos pase lo mesmo lleendo esta novela, introducción prestosa a l'abandonoloxía.