Esti ye un poemariu nel que, si bien Caronte nun ye a cruciar de tanta guapura que tien, l’autor quier que nos somorguiemos nella, bien diendo pela rampla o tabayón abaxo, bien recordando la d’aquel branu y la de la güerta, bien sintiendo rinchar la exa’l mundu mientres San Pedro esbilla unes ablanes. La guapa propuesta poética del poeta polesu preséntase equí con nome de muyer y cola clin espelurciao, porque ye la guapura del sudu y del amor, la de los curruscos y la de la lluz de los crisantemos morrisianos. Una obra heteroxénea que lo mesmo descubre la casa de Cohen n’Hydra que tastia la espluma nel Ca Beleño, porque nella tropiecen lo yerbato y lo nipón p’acabar regalándonos unes instrucciones pa pulgar una mazana.