Enrique Carballeira (L’Infiestu, 1970) ye periodista, escritor, diseñador y ilustrador. Redactor d’Onda Cero Radio y del diariu El Comercio, ye autor d’un bon númberu de llibros pal públicu infantil, mesmo qu’obres de cómic, cuentos p’adultos y humor gráfico, ámbitu esti nel que destaca la publicación selmanal de les tires d’humor gráficu «Les coses de Nardo y Quina», que vienen apaeciendo de manera continuada dende va venti años nos periódicos El Nora y El Fielato y «Los Urriellu» nel diariu El Comercio. Amás d’ello, nos últimos años punxo en marcha diversos proyectos editoriales, talleres d’escritura, d’ilustración y de llingua asturiana, mesmo que proyectos audiovisuales y d’animación.

Ganó’l Premiu de Narrativa Infantil y Xuvenil «Montesín» y el premiu Llectures pa Rapazos de l’Academia de la Llingua Asturiana, en delles ediciones. Tamién tien el Premiu de Cómic de la Comarca de la Sidra. Con L’arume de la tierra ganó’l VI Premiu de Cómic «Alfonso Iglesias» del añu 2014.