No que cinca los seres de lleenda ye la novela ganadora del Premiu «Enriqueta González Rubín» de Narrativa Moza que convocó la Conseyería de Cultura, Política Llingüística y Turismu la primer vez nel añu 2021. «El corazón d’una xana / ye como un ramu d’espín / cúrialu bien, chalaneru, / que nun funda pel camín». Estos versos de la canción popular Chalaneru que falen de la xana que llora na fonte La Nalona son el ñuedu d’esta novela de fantasía, tradicional, clásica y moderna al tiempu: la mitoloxía asturiana y les lleendes que la sustenten y la tresmiten de xeneración en xeneración viven y s’espeyen na vida d’Antón, d’Eli, d’Ánxel, d’Ale y de so ma; son la manda familiar a la que nun pueden renunciar. No que cinca los seres de lleenda da una visión distinta de la lliteratura y la música popular y con ella Blanca Fernández Quintana derruempe un camín nuevu pa la narrativa asturiana d’anguaño.