Una de les pieces más importantes del rompecabeces que constitúi l`imaxinariu colectivu asturianu ye la mítica traditio irredenta que presenta al conxuntu d`asturianos como una colectividá «nunca vencida» que resiste siempre y con toles fuerces al invasor. Tovía en sieglu XXI caltiénse toa una mitoloxía al respective qu`esplica en della midida que la historia d`Asturies inda sía la gran desconocida pa los asturianos y asturianes d`anguaño.

Nun ha chocanos, poro, qu`esi borrín míticu arrodie acontecimientos como los del 25 de mayu del 1808 y que d`esos fechos los más de los asturianos nun puedan dicir muncho más de lo qu`escribiere Winston S. Churchill na so A History of the England-Speaking Peoples, onde indicara que «la provincia pequeñísima d`Asturies, na costa vizcaína, deseparada per montes del restu d`España, ensin saber nada de lo qu`esa parte facía, espulsó al gobernador francés, apoderóse del arsenal con un botín de cien mil mosquetones, constituyóse gobiernu independiente, declaró la guerra a Napoleón no cimero de la so grandeza y mandó unviaos pa Inglaterra col envís de solicitar alianza y ayuda. Los unviaos calaron en Falmouth na nueche del 6 de xunu y l`Almirantalgu llevólos énte Canning. Canning comprendió. De magar emprimaba la guerra peninsular».

La importancia del 25 de mayu del 1808 na historia asturiana fai qu`esti episodiu plantie controversies historiográfiques pero al empar esplícanos que sía una etapa usada por sectores ideolóxicos bien distintos. L`autor d`estes páxines tien la honestidá de nun s`esconder y dexar claro la so visión republicana y asturianista a la d`estudiar unos fechos que reivindica «porque foi una revolución, porque foi un procesu soberanista y porque ye un elementu de memoria compartida pa toles corrientes polítiques»._x000D_ Faustino Zapico Álvarez (Mieres del Camín, 1970), llicencióse n`Historia y Xeografía na Universidá d`Uviéu nel 1995 y dende`l 1996 vien dando clase d`Historia en distintos centros d`Enseñanza Secundaria; agora prepara la tesis doctoral sobre les corrientes federalistes y autonomistes na Asturies contemporánea. Otramanera, fo elexíu Secretariu Xeneral d`Izquierda Asturiana en xineru del 2007.