La llingua n'Asturies al traviés de los sieglos

Viejo Fernández, Xulio

Editorial: Trea

ISBN: 978?84-19525?29?1

Publicación: 2022

Nº de páginas: 200

Precio: 15,00 €.

Entamau por la Conseyería de Cultura, Política Llinguística y Turismo y el Ministerio de Cultura y Deporte, esti volume ofrez una síntesis de la historia social del llinguaxe nel territoriu asturianu dende los primeros nicios prehistóricos hasta l’actualidá, poniendo l’acentu nes claves de la evolución histórica de la llingua neollatina que, de magar la romanización de les tierres al noroeste del ríu Ástura y tres d’un llargu procesu de conformanza na Edá Media, acabó por conocese dende’l sieglu XVI como asturianu.

La valoración d’esta llingua dientro y fora d’Asturies, la reflexón intelectual al rodiu d’ella, la so tradición lliteraria o les iniciatives de normativización académica y, en definitiva, la complexa vivencia social d’unes cuantes xeneraciones d’asturianos a cuenta d’ella, espónense nestes páxines con cuenta d’apurri?y una base sólida a la necesaria reflexón colectiva sobre un patrimoniu cultural cimeru qu’afronta nesti entame del sieglu XXI una encruciada decisiva.

Col sofitu d’abondes ilustraciones (les más yá emplegaes na esposición Voces del añu 2018) esti llibru busca afitar de manera cenciella y accesible un discursu científicu sobre la llingua asturiana que sía quien a integrar de manera crítica les aportaciones d’una yá más que centenaria tradición filolóxica dende dos principios inescusables: la oxetividá del datu y la coherencia nel análisis.

Frente a enfoques más marcadamente ideolóxicos enquistaos nel debate públicu sobre la llingua ya incluso en dellos averamientos académicos al respective, asúmese una visión universalista del llinguaxe qu’afirma de mano la plena ya igual dignidá de toles formes de fala y contempla la variedá mesma d’elles como espresión xenuina de les capacidaes humanes pal conocimientu, la creatividá y la empatía social. Propónse con ello una mirada humanista a la llingua asturiana que nun depende del diferencialismu identitariu sinón d’una contrastada convicción racionalista na validez de toa esperiencia histórica.