En Bubiella’l tiempu pasa lentu y chornosu. La xente qu'habita ellí vive la vida porque hai que la vivir, como una condena d’años nun fornu ensin aire nel que nunca nun pasa nada, anque siempres paez a piques de llegar la desgracia y la tensión va medrando col pasar de los díes. Firmu, el fíu d’El Llobu, el curanderu’l valle, vuelve pal pueblu en separándose de la muyer. Ellí va reconociendo les cases y les cais, el paisaxe y recordando a dellos vecinos o conociendo a otros que nunca nun viera. Con una prosa densa, morosa, la voz del narrador va poniendo negro sobre blanco la vida n’apariencia cenciella pero enllena de secretos y mentires d’un pueblu, d’una xente que paez movío por filos esternos y ayenos: marionetes de carne y güesu. La vida en Bubiella ye un fornu ingriente a piques de reventar.