Esta antoloxía de la narrativa actual escrita por muyeres supunxo una novedá absoluta, axudando a normalizar un panorama nel que s'echaba en falta l'aportación de les muyeres. Mª Teresa González, Carme Martínez, Esther Prieto, Lourdes Álvarez, Consuelo Vega, Berta Piñán y Maite G. Iglesias son les siete muyeres seleccionaes pa esta novedosa antoloxía, ordenada cronolóxicamente. Nel momentu de la publicación nengún de los cuentos taba recoyíu en llibru. Amás de les notes biográfiques y de la bibliografía de cada autora, la obra complétase con un prólogu d'Oliva Blanco Corujo, profesora de Lliteratura, que vien dedicando desde va tiempu trabayos a la lliteratura asturiana y al feminismu. Esta obra yá va pela segunda edición.