Taller de autodefensa feminista


El sábado 17 de octubre de 10:30 a 14.30h. Taller de autodefensa feminista. Es necesaria la inscripción previa.

[El grupo está ahora mismo cerrado, pero las personas interesadas podéis escribir a: cambalache@localcambalache. org para informaros cuando vuelva a abrirse]


¿Qué ye l’autodefensa feminista?
Dende va tiempu vienen deprendiéndose talleres baxo’l conceptu d’autodefensa feminista que de por sí nun cumplen los criterios de la mesma. Asina, ficieron por ponese al mandu de l’autodefensa feminista instituciones que busquen fomentar la nuesa victimización, organizaciones fascistes y/o persones que nun sufren la violencia patriarcal; deprendiéndose tamién como defensa personal ensin contemplar la perspectiva feminista
nin l’autodefensa psicolóxica.

Ye importante qu’énte esti contestu naide que nun seyamos nosotres mesmes mos deprenda cómo lluchar, de manera que toes partamos d’una base oxetiva respetando les llínies, la hestoria, los criterios de l’autodefensa feminista y el trabayu previu de toles muyeres que mos truxeron hasta equí.

Atendiendo a esta situación, el xacíu d’esti testu ye que toes aquelles que’n dalgún momentu dubiamos d’en qué consistía l’autodefensa feminista, o nun tuvimos la información conveniente cuando la precisamos, podamos resolver toles dubies y afincar les báses de lo que sí ye y de lo que nun ye l’autodefensa feminista.

Un pocu d’hestoria
L’autodefensa feminista ñaz a finales de los años 70 en Canadá gracies a un grupu de muyeres feministes que trabayaben temes rellacionaes cola violencia de xéneru. Nel estáu español entama a plantegase dende grupos antiagresiones y distintes organizaciones feministes pel añu 87.

L’autodefensa feminista desendólcase n’espacios non mistos porque decidímoslo asina, porque queremos xenerar esos llugares propios llibremente. Porque partimos de la premisa de que, nos espacios mistos, les diferencies de xéneru marquen actitudes distintes nes formes de participar, de tar, de tomar decisiones… Si queremos, precisamente, empobinar la llucha escontra’l machismu, nun hai cabida a compartir esi espaciu coles persones que disponen del privilexu que cuestionamos. Porque trabayamos dende l’autoconciencia de la nuesa opresión y la de vivir nuna sociedá patriarcal.

Pa nós la autodefensa feminista ye…
L’autodefensa feminista nun ye defensa personal pa muyeres. Como yá señalamos, el so rasgu elemental ye que se desendolca nun espaciu non mistu, onde nun participen homes cis (esto ye, que s’identifiquen cola identidá sexual que-yos foi asignada al ñacer). Otru de los sos componentes ye que nun se centra en nengún arte marcial concretu, si non que nútrese de múltiples técniques. Nun ye competitiva, nin tien graos d’esperiencia. Al contrariu, partimos de les conocencies y los ritmos d’aprendizaxe de ca úna pa crear un espaciu de cuidao y cooperación ente toes.

Sabemos que les violencies machistes son la base de la cadarma heteropatriarcal
que mos impon, según el xéneru asignáu, unos roles determinaos. Por eso, nun encetamos sólo’l planu de la autodefensa física, sinon tamién l’emocional, entendiendo que les violencies machistes nun se manifiesten como agresiones físiques namai.

Pa nós, l’autodefensa feminista trai la idega d’autoxestión, d’horizontalidá, y nun ta venceyada a les instituciones. Asina, afítase nel sofitu mutuu, la confianza y los llazos que vamos xenerando ente toes.

Nos espacios d’autodefensa feminista lo que compartimos ente nosotres queda ente nosotres: la confidencialidá ye fundamental. Nun s’asoleya fuera d’estos espacios, a nun ser con otres compañeres que precisen d’estes técniques y esperiencies, y entovía nun pudieren formar parte de nengún grupu.

Pa nós ye perimportante que surdan otros grupos d’autodefensa feminista, pa que cada vez seyamos más. Pola mor d’ello sentímonos motivaes pa espublizar esti testu. Pa que la información mos faiga llibres, allume’l nuesu camín y aúne les nueses lluches.