Un gallín allegre, arañes que se maten de risa, un barquín con mieu a navegar, un catasol que nun quier esnalar, un gochín porconzón o una perrina sideral. Ellos son dellos de los protagonistes de Kikirikikí, llibru-discu con testos y música d’Alicia Álvarez (Pauline en la Playa, Bestiariu, Pulgarina y ¿Qué te fai falta pa ser un héroe?). Ocho canciones n’asturianu pa neñes y neños que falen de los sentimientos, les emociones o los mieos a traviés de les histories d’animalinos, bichos y otros tienros personaxes. Les ilustraciones de la artista Alicia Varela, enllenes de poesía y costumismu, acompañen les lletres de les canciones nesti llibru pequeñu y máxicu que trata de face-yos un homenaxe a les publicaciones clásiques infantiles onde la natura y los animales sirvíen pa esplicar el mundu pa los más pequeños.