Tres el desastre d’Annual d’a finales de xunetu del 1921, cuando l’Exércitu español nel protectoráu de Marruecos sufrió una grandísima derrota que significó la muerte d’unos 12.000 soldaos, la solidaridá colos muertos y colos que lluchaben nel Rif ponse en marcha aguiyada poles páxines d’unos periódicos que s’inflen de patriotismu y afalan a lluchar contra l’infiel. Esa solidaridá, qu’espolleta d’un día pa otru y que va amoreciendo pasín a pasu hasta desapaecer menos d’un añu depués, ye lo qu’analiza Arantxa Margolles nesti estudiu Fuimos granos d’arena, a través de les noticies apaecíes na prensa de la época (El Comercio, El Noroeste, El Carbayón, La Prensa, El Oriente de Asturias, La Voz de Avilés...). Danos cuenta tamién l’autora del papel de la oposición a aquella guerra, tan minoritaria y silenciada que malapenes se dexa sentir más nada que nel silenciu. Ye interesante ver cómo n’Asturies, «cuna del cristianismu», dase un movimientu de «solidaridá espiritual» pa colos probes soldaos, porque «la que s’adelanta a les otres rexones d’España n’acometer la cruzada contra los moros, nun pue agora quedar atrás», en palabres del obispu d’Uviéu na época: mesmo qu’Asturies acabó cola «morisma» sieglos primero na batalla de Cuadonga, asina hai que rematar a la morisma del Rif. Nun escaez tampoco Arantxa Margolles Beran estudiar el papel de la muyer nesta campaña de solidaridá o caridá: como «Ánxel del hogar» llevando’l so papel de cuidadora paciente, sufridora abnegada y postulante de grandes resultaos: madrina de guerra. Y too ello a través, principalmente, de tres organizaciones humanitaries: Cruz Bermeya, Paz y Caridad y Acción Católica.