En febreru del 1992 Guus Hiddink, entrenador del Valencia, manda quitar una bandera con esvástica d’una valla de Mestalla. En marzu d’esi mesmu añu y na mesma ciudá celébrase un «concierto en defensa de la raza» (sic) qu’axunta a nazis de tol Reinu d’España. Un añu más tarde, un 11 d’abril del 1993, un rapaz valencianu llamáu Guillem Agulló i Salvador ye asesináu por un grupu de nazis en Montanejos. En conociendo la noticia del crime, el dolor y la rabia trespasen les llendes de Burjassot y lleguen a tolos llugares del Estáu español onde hai antifascismu organizáu. La denuncia del asesinatu enllenó fanzines y muries y pa delles xeneraciones de mozos y moces la muerte de Guillem implicó’l tener presente’l peligru que supón el fascismu y deprender la llección que pa paralu hai que s’enfrentar a él con determín. Guillem ye una novela documental de Núria Cadenes que puede emocionavos, que puede facevos llorar y que puede enllenavos de rabia, porque ye un viaxe a un mundu d’impunidá onde los guardiasciviles nun son a escribir correcto’l nome de la víctima nin una vez, onde los xueces echen un pigazu cuando los testigos declaren y onde un periódicu culpa a la víctima. Un mundu que sigue esistiendo pero que nun va ser a evitar que tres de la llectura Guillem Agulló i Salvador viva pa siempre en vosotros y vosotres, llectores.