«¿Qué ye lo que saben los árboles, cola so paciencia vexetal, llantaos, inmóviles, nel centru mesmu del so propiu mundu? Podemos pensar que son seres espertos nel pasu del tiempu, nel ritmu cada vez menos precisu de les estaciones y que conocen a la perfección la tierra y la semiente de la que biltaron. Nun ye poca cosa. Pero María Fernández Abril nun tien, namás, los pies na so tierra, ye una muyer qu’anda’l mundu y que sabe arrodiase tamién de los mundos diversos que nos ufierten los llibros, el cine y la música. Y con too eso, l’autora d’esti poemariu alimenta la so voz poética, inquieta y curiosa, que xuega a adoptar distintes formes. Ye una voz billingüe, femenina, vital y esperanzada, que nun escapa de les esperiencies que la conmueven, por difíciles que seyan, sinón que les observa con tenrura y humor. Una voz, amás, que se fai cómpliz d’otres voces, asturianes y universales, d’Emily Dickinson a Marta Mori, ensin olvidar El Quixote y la Ilustración española (esos poetes incomprendíos), porque sabe que lo que tenemos dientro munches veces se siente meyor dicho poles palabres d’otros. Por eso paga tamién la pena escuchar les d’ella», Laura Marcos.