Al concede-y el premiu Máximo Fuertes Acevedo d’Ensayu 2022, el xuráu destacó que Asturianía Kitsch. Decálogu de la cultura pop astur «analiza la cultura asturiana moderna dende una perspectiva novedosa, percorriendo los sos iconos con datos nuevos sobre temes y personalidaes que’l públicu va reconocer y va sentir como propios».

«Gu?ei los cantares recoyíos por Los Urogallos y L’Abadía suenen nos chigres de moda de Xixón, onde folkis, hipsters y viceversa baillen y aplauden a L-R, Algaire, Fruela 757 o Rodrigo Cuevas. Una revolución de la escena folk gracies a un procesu continuu de reinterpretación de coses nueves y vieyes. Una muestra más de cómo la identidá asturiana fixo por construyir un discursu pa definise y empoderase nes esferes y espacios públicos. Un procesu de resistencia y reellaboración crítica que nun muestra más que les ganes de siguir siendo d’un colectivu humanu. Un pueblu que forxó la so propia forma de ser, pero que nun refugó les influencies que veníen d’otros llares. Una cultura que dexa bien a les clares la so diversidá y heteroxeneidá. Una voluntá de ser y d’existir siempre en constante evolución».