Los cuatro del Makulusu dexaron atrás l’amistá d’ayeri, agora con vides y caminos que se crucen y que se separten nuna tierra onde la muerte ye una institución cotidiana, nacional y familiar. La memoria del narrador peñera los recuerdos y anda ente lo real y lo fantasioso pa mostrar la complexidá y la violencia de les rellaciones humanes n’Angola. Viaxái con ellos per eses calles escondíes al progresu... calles d’utopíes... calles personalizaes, coloniales, colonialistes, calles de sangre... Falái con ellos nesi portugués aquimbundao, amái como les muyeres qu’amen, porque vamos llegar al añu III de la guerra y en Luanda hai golor de muerte, de café y de roses, golor a bacaláu asao y a funje. Lléei estes páxines de llucha de clases y de choque ente dos mundos distintos pente cadabres, sin saber si la verdá tien que ser siempre dolorosa y sin dicir si negáis la política d’integración y d’otres coses acabaes n’-ón. Nós, los del Makulusu ye una novela escrita con una perspectiva utópica, onde l’autor denuncia’l colonialismu al tiempu que pon en valor la cultura angolana col usu d’un llinguaxe col que frayar el silenciu dictáu pola colonización, col que mostrar la so visión del mundu y col qu’alcanzar la llibertá. Luandino Vieira escribióla nuna selmana nun campu de concentración asitiáu en Cabu Verde que yera conocíu colos nomes de Pântano da morte y Campo da morte lenta.