Esti volume atropa tola poesía de Naciu ‘i Riguilón (Mual, Cangas del Narcea, 1962), poesía pura, senciel.la ya enforma personal. Tres son las partes nas que ta dividíu’l l.libru, que se correspuenden conos dous poemarios yá va tiempu publicaos (Queixas ya conxuros, 2001, ya D’un tiempu que foi, 2005) amás del inéditu conxuntu de dibuxos, «Poemas gráficos».

En versión bil.lingüe asturianu-castel.lanu, nesti poemariu puede rastrexase l’universu personal, míticu ya intimista del autor. Si en «Queixas ya conxuros» predomina’l versu enraigonáu nel sentimientu míticu d’Asturias, cono bardu Xalabam cumu protagonista central, en «D’un tiempo que foi» l’autor preséntanos unos poemas más intimistas ya desnudos de retórica, na mesma l.línia minimalista que las guapas ya senciel.las ilustraciones que coforman la parte gráfica d’esta triloxía.